Қазақстан құрамасы Уэльс футболшыларынан ұтылып қалды

Кардиффте алаң иелері 3:1 есебімен басым түсті. Бұл ойын Қазақстан құрамасының бас бапкері міндетін уақытша атқарып жүрген Али Алиевке сабақ болады деп үміттенеміз. Ұжымдағы ардагер ойыншыларымыздың санын әлі де азайту керек сияқты.

Жанын беріп, жүгіріп жүрген жігіттер бар. Бірақ үш гол да өзіміздің кейбір ойыншылардың өрескел қателіктерінен соң соғылды. Өкінішті, әрине... Бас бапкеріміз де, қақпашыларымыздың жаттықтырушысы да бүгінгі матчты әбден саралап, қорытынды шығаратын шығар. Алдағы матча тек жеңіске жетулеріне тілектеспіз.

Жалпы, бұл ойында алаң иелері тез гол соқты. 9-минутта біздің қорғаушылар қателесіп, допты айып алаңымыздан теуіп шығара алмай, жаза басты. Уэльс құрамасы бұл мүмкіндікті мүлт жіберген жоқ.

Бірінші таймның екінші жартысында доп Уэльс қорғаушысының қолына тиіп, Қазақстан құрамасы пенальти тебу мүмкіндігіне ие болды. 11 метрлік айып соққысын Асхат Тағыберген орындап, тура ортаға тепті.

Алайда, теңбіл доп... сол жағына қарай секірген қақпашының аяғына тиді. Абырой болғанда, секек қағып, қақпаның екінші бұрышындағы сызықтан асты. Гол. Негізі, Асхат та өзгелерден бұрын ұмтылған болатын.

Екінші тайм басталған бетте, алаң иелері тағы да алға шықты. Доп ойынға бұрыштан қосылып, біздің қақпашы оны қағып жібермек болып, секірген болатын. Бірақ доғаша иілген допқа қолы жетпей, жаза басты. Уэльс ойыншысы мұны да мүлт жібермей, қарауылсыз қалған қақпаға доп енгізді.

Ойын соңында біздің бапкерлер төрт ойыншымызды алмастырған. Солардың екеуі қолды-аяққа тұрмай зыр қағып, біздің құрама бірнеше шабуыл ұйымдастырды.

Өкінішке қарай, сондай шабуылдың бірінде кері қайтып үлгермей, тылдағы кейбір шебіміз мүлде ашық қалды. Алаң иелері мұны да бос жібермей, жылдам ойлап, тез қимылдап, тағы бір соғып кетті. Сөйтіп, екі доп айырмасымен басым түсті.

Уэльс – Қазақстан – 3:1 (1:1)

Уэльс: Дарлоу, Н.Уильямс, Б.Дэвис, Родон, К.Робертс, Томас, Шихэн, Джонсон (Харрис, 62), Брукс (Дж.Джеймс, 62), Дэн.Джеймс (Матондо, 86), Каллен.

Қазақстан: Заруцкий, Вороговский, Быстров, Әліп, Марочкин, Тапалов, Тағыберген, Мужиков (Жуков, 62), Самородов (Сәтбаев, 74), Чесноков (Кенжебек, 86), Жақсылықов (Айымбетов, 74).

Голдар: Дэн.Джеймс, 9 (1:0). Тағыберген, 32-пенальтиден (1:1). Б.Дэвис, 47 (2:1). Матондо, 90 (3:1). 

Ескерту: Самородов, 42. Чесноков, 61.

Естеріңізге сала кетейік, Қазақстан құрамасы 2026 жылғы Әлем чемпионатының іріктеу кезеңі аясындағы келесі ойынын наурыздың 25-інен 26-сына ауған түні, түзде Лихтенштейн футболшыларымен өткізеді.

Айқын Жаппар