«Семей» ШФК – Қазақстан кубогының иегері
Бүгін, Талдықорғанда, футзалдан 2024/25 жылдар маусымындағы Қазақстан кубогының финалы өтіп, онда «Семей» ШФК жеңіске жетті.
Семей футзалшылары финалда «Қайрат» АФК-ынан үстем түсті. Есеп – 5:1. Былтырдан бері, осы екі ұжым арасындағы шектен тыс қызу бәсекелестік жанкүйерлерді қызықтырып келеді. Дәл қазір Қазақстан чемпионатында «Қайрат» көш бастап келе жатқанымен, өткен маусымда «Семей» ел чемпионы болған. Олар шешуші матчта алматылықтарды 3:1 есебімен сан соқтырып кеткен болатын...
Жалпы, биылғы ел кубогының шешуші ойындары Талдықорғанда өтті. Еліміздің төрт үздік командасы Жетісу төрінде бас қосып, әуелі жартылай финалдық ойындарды өткізді. Оның бірінші жұбында «Семей» 5:2 есебімен «Ақтөбе» ШФК тізе бүктірді.
Ал екінші жартылай финалдық жұпта «Қайрат» Рудныйдың «Аят» командасымен кездесіп, 3:0 есебімен басым түсті. Сөйтіп, финалда алматылықтар мен семейліктер додаға түскен болатын. Нәтижесі төмендегідей:
«Семей» ШФК – «Қайрат» АФК – 5:1 (3:0)
Голы: Кайо Торрес, 3. Андерсон Алвес, 16. Кайо Торрес, 19. Габриэль Дос Сантос, 22. Ақжол Дәрібай, 36 – Денер, 24.
«Семей» ШФК: Лео Игита (қ) – Андерсон Алвес, Ринат Төреғазин, Габриэль Дос Сантос, Кайо Торрес – Жайме (қ), Рауан Атантаев (қ), Шыңғыс Есенаманов (к), Ақжол Дәрібай, Әбдірасул Әбдуманапұлы, Родригиньо, Ержан Кәрменов, Никита Емельянов, Камиль Герейханов.
Бас бапкер қызметін атқарушы: Аслан Смақов
«Қайрат» АФК : Нарын Серіков (қ) – Жахангир Рашит, Денер, Занотто, Кевин Арриета – Ерасыл Шарапиденов (қ), Біржан Оразов (к), Арнольд Кнауб, Эдсон, Дамир Қайырбай, Дәурен Тұрсағұлов, Кайо Руиз, Әлішер Сарсенбаев, Алиссон.
Бас бапкер: Марлон Веласко.
23 наурыз, 2025 – 19:00. Талдықорған. «Жастар».
Әлихан Түсіп
