Әнұранымызды әйгілі Канада сазгері орындады
Бүгін хоккейден «Барыс» – «Сибирь» арасындағы матчтың алдында Қазақтың Әнұранын әйгілі композитор, продюсер, музыка майталманы Стив Баракатт орындады.
Әйгілі музыкант «Барыстың» жолын ашып берді. Негізі, ол 8 наурыз күні «Астана опера» театрында өнер көрсетеді екен. Сол үшін келіпті, біздің елге. Канада азаматтарының шайбалы хоккейді жек көретіні болушы ма еді. Бір күн бұрын, біздің "Спорт басылымдары федерациясының" жігіттері барып, сөйлескен болатын.
Онда Стив мырзаға өтініш білдіріп, «хоккейді жақсы көретініңізді білеміз. 1991 жылы Канада мен КСРО құрамалары арасындағы матч алдында екі елдің Әнұранын фортепьяномен ойнадыңыз. Біздің де Әнұранды орындап берсеңіз», – деп ұсынысымызды көлденең тартқан.
Стив Баракатт бұан қуана келісті. Қазақтың Әнұранын "Барыс-Арена" мұзайдынында орындау мәртебе деп қабыл алды. Өкінішке қарай, аталған хоккей клубының сапалы фортепьяноны жалға алып, мұзайдынға құрып беруге шамасы келмеді. Қазір жағдайлары сондай екен...
Әйтсе де, Стив Баракатт біздің елдің Әнұранын зор ілтипатпен орындады. Тек "Астана опера" театрында... Оның бейне жазбасы матч алдында үлкен экран арқылы көрсетіліп, үні спорт сарайды кернеді.
Сондай-ақ, Стив мырза шайбаны ортаға тастап, қызықты ойынды бастап берді. Көңілі кең, қолы ашық адам екен. Ол бастап берген ойын Қазақ елі клубы үшін сәтті аяқталды. «Барыс» турнир кестесінде өзінен төрт саты жоғары тұрған «Сибирь» клубынан 4:1 есебімен басым түсті. Бұл – «Барыстың» ҚХЛ-дағы 500-інші жеңісі. Әрі 17 желтоқсан бергі ойынның негізгі уақытында қол жеткізген таза жеңс болып шықты.
Әлтайыр Ілиясұлы
