Қазақстан футзалшылары Армения құрамасынан ұтылып қалды

Ұлттық құрама Еуро-2026 додасының тікелей жолдамасына қол жеткізе алмады. Сегіз жылдай Бразилия маманы Кака жаттықтырып жүрген Қазақстан құрамасы тоқырау кезеңіне тап болғандай...

Бүгін Ереванда Армения құрамасымен кездескен Қазақстан футзалшыларына жеңіс ауадай қажет еді. Басты бәсекелесін жеңсе, сонда ғана 2026 жылғы Еуропа чемпионатының жолдамасына ие болар еді. Өкінішке қарай, біздің жігіттер ұтылып қалды. Есеп – 2:4.

Ендігі жағдайы – тым мүшкіл. UEFA туы астында өтіп жатқан, 2026 жылғы Еуропа чемпионатының іріктеу додасында 10 топ бар. Бірінші орын алғандар Латвия мен Литвада өтетін құрлық біріншілігіне тікелей шығады.

Енді, осы 12 құрамаға (чемпионат қожайындарының екеуін қосқандағы) төрт команда қосылуы керек. Яғни қалған төрт жолдама «түйіспе» ойындар арқылы сарапқа салынады. Бірақ оған екінші орын алған командалардың бәрі қатыса алмайды.

10-іріктеу тобындағы екінші орын алғандардың сегізі ғана, яғни техникалық көрсеткіштері жоғарылары қалған төрт жолдамаға таласады. Қазақстан құрамасы екі рет ұтылып қалып, бір ойында тең түсті. Сегіз ұпай жоғалттық .Қоржынында – он ұпай. Ал армияндар 16 ұпай еншіледі.

Ашығын айтуымыз керек, жағдай – қиындау. Біздің құраманың доп айырмасы да аса жоғары емес (+5 қана). Енді қалған топтардағы барлық ойындардың аяқталуын күтеміз. Ал топтық кезеңдегі соңғы матчтар 10 сәуір күні өтеді.

Айқын Жаппар