Әлем чемпионатының ширек финалына 10 қызымыз шықты
Бокстан Сербияда өтіп жатқан әйелдер арасындағы Әлем чемпионатында ширек финалдық жекпе-жектері басталды.
Әйелдер арасындағы биылғы Әлем чемпионаты 12 салмақ дәрежесінде өтіп жатыр. Ширек финалға Қазақстан құрамасының 10 боксшы аруы шықты. Екеуі алғашқы жекпе-жектерінде, төрешілер шешімімен, жеңіліске ұшыраған болатын. Олар – Анита Адишева (52 келі) және Гүлсая Ержан (81 келі).
Бүгін жартылай финалдық жекпе-жектер өтіп, күндізгі сессияда, рингке біздің қыздардан бірінші болып, Алуа Балқыбекова шықты. 50 келі салмақтағы ел намысын қорғап жатқан қайсар қызымыз түрік қызы Айсен Ташкинмен кездесіп, 5:0 есебімен жеңіске жетті.
Одан кейін 54 келі салмақта бақ сынайтын Жайна Шекербекова шықты. Ол ринг «қожайыны», яғни Сербия қызы Сара Сирковичпен кездескен. Өкінішке қарай, тартысты өткен жекпе-жек соңында төрешілер жеңісті серб спортшысына берді. Есеп – 3:4. Жайна жүлдесіз қалды.
60 келі салмақ дәрежесіндегі Виктория Графеева Париж Олимпиадасына қатысқан өзбек қызы Ситора Тұрдыбековамен кездесіп, басымдық танытты. Тіпті екінші раундта қарсыласын нокдаунға жіберді. Ширақ қимылдап, 5:0 есебімен жеңіске жетті.
66 келідегі ширек финалдық жекпе-жектердің бірінде «қазақ дербиі» өтті. Біздің Жасмин Қизатова Ресейдің намысын қорғайтын, Еуропа чемпионатының күміс жүлдегері Альбина Молдажановамен жұдырық түйістірді. Өкінішке қарай, үшінші раундта жекпе-жек тоқтатылып, жеңіс Молдажановаға берілді. Екі нокдаун, әрі техникалық нокаут тіркелді.
+81 келі салмақта бақ сынаған Елдана Тәліпова шаршы алаң «қожайыны», сербиялық Сара Милжковичпен айқасты. Бірінші раундта оны нокдаунға жіберіп, жекпе-жекті сауатты бастады. Екінші раундта төреші Елданаға ескерту беріп, бір ұпайын кемітсе де, жанкештілік танытып, жеңіске жетті. Есеп – 5:2.
Сөйтіп, әзірше үш қызымыз жартылай финалға шықты. Бұл – қазірдің өзінде үш медаль қоржынымызда деген сөз. Енді кешкі сессияда бақ сынайтын бес қызымыздың рингке шыққандарын күтеміз. Әрі оларға жеңіс тілейміз.
Әлихан Түсіп
