Әбиба Әбужақынова Австрияда топ жарды
Қазақтың дзюдошы қызы Әбиба Әбужақынова Австрияда өтіп жатқан Гран-При сериясы турнирінде алтын медаль жеңіп алды.
Ол Линц татамиінде қарсылас шақ келтірген жоқ. 48 келі салмақ дәрежесінде бәсекелестік өте жоғары болды. Халықаралық дзюдо федерациясының ресми сайты 18 жастағы өзбек қызы Лазиза Хайдарованың өнеріне сүйсініпті.
Алайда, талантты өзбек қызы өзінен бір жас үлкен Жапония аруы С.Йошинодан ұтылып қалды. Әйтсе де, қола жүлде үшін белдесу мүмкіндігіне ие болып, жеңіс тұғырының үшінші сатысына көтерілді.
Біздің Әбибаның да қарсыластары жеңісті қолдан бермейтін, қайсар қыздар болды. Қазақ қызы әуелі Жапонияның тәжірибелі балуаны Мизуку Хараданы алып соқты. Одан кейін татами «иесі», Австрия аруы Жаклин Шпрингерді ұтты.
Жартылай финалда Нидерланд елі үміт артқан Эмбер Герсджестен айласын асырды. Ал финалда, жоғарыда атап өткен, өзбек қызын жолынан тайдырған С.Йошиномен белдесті. Жапон қызы бірінші болып ұпай еншілегенімен, Әбиба оны татамиде тырп еткізбей ұстап, жеңіске жетті.
Жалпы, бүгін Әбибадан басқа тағы да 4 дзюдошымыз бақ сынаған. Алайда бәрі алғашқы електерден өте алмады. Толғанай Әбеуова (52 келі) бірінші белдесуінде Сербия қызы М.Николичтен ұтылса, Дана Әбдірова (57 келі) Хорватия аруы Д.Бортасқа есе жіберіп алды.
Әзірше, жігіттеріміз де жүлдеге жете алмай жатыр. Талғат Орынбасар (60 келі) бірінші белдесуінде Швейцария дзюдошысын ұтқанымен, келесі айналымда Бразилия балуаны М.Аугустодан аса алмады. Нұрмұхамет Ботабай (66 келі) әуелі неміс Н.Шмидтен өткенімен, бұдан кейін өзбек Д.Баратовтан жеңіліп қалды.
Айқын Жаппар
