«Қайрат» «Ордабасы» клубын ойсырата ұтты
Бүгін Қазақстан премьер-лигасында екінші турдың ойындары басталып, төрт ойыны өтті.
Екінші турдағы басты матч «Қайрат» пен «Ордабасы» арасындағы ойын болатын. Бірақ бұл матч көпшілік күткендей, аса тартысты болмады. Алматы клубы Алатау бөктерінде жүлделі орындардан үмітті команданың бірін ойсырата ұтты. Есеп – 4:0.
Өткен турда, өз алаңында «Ақтөбе» клубымен тең түскен «Ордабасы» (0:0) бүгінгі матчта да өрнекті ойын үлгісін көрсете алмады. Сөйтіп, жалқы ұпаймен көш соңындағы командалардың біріне айналды. Ал доп айырмасы – мүлде нашар. Әлі гол соға алмай, бүгін өз қақпасынан төрт доп «қармады».
Бұл турда «Тобылдың» суырылып алға шығар тамаша мүмкіндігі болып еді. Алайда Қостанай клубы «Астана-Арена» стадионында елордалық «Жеңістен» айласын асыра алмады. Шиеленісті өткен ойында есеп ашылған жоқ. Екі ұжым бір ұпайдан еншіледі.
Екінші турда отандық футбол жанкүйерлерін таң қалдырған «Оқжетпес» болды. Ойынды бір ғана легионермен бастаған Көкше клубы өз алаңында «Атырауды» тізе бүктірді. Бас бапкері Андрей Ферапонтовтың сауатты тактикасымен үш ұпай олжалады.
«Жетісу» да қостанайлықтар секілді, бұл турда екі ұпай жоғалтты. «Хан Тәңірі» стадионында премьер-лигаға биыл қосылған «Ұлытау» командасының қақпасына гол соға алмай, сергелдеңге түсті. Ал Жезқазған жігіттері қоржындарына алғаш рет ұпай салып, оңтүстіктен олжалы қайтты.
«Қайрат» (Алматы) – «Ордабасы» (Шымкент) – 4:0 (3:0)
Голдар: Зариа, 9. Жоао Пауло, 38. Зариа, 45+2-пенальтиден. Станоев, 74.
«Жеңіс» (Астана) – «Тобыл» (Қостанай) – 0:0
«Жетісу» (Талдықорған) – «Ұлытау» (Жезқазған) – 0:0
«Оқжетпес» (Көкшетау) – «Атырау» – 2:1 (1:0)
Голдар: Жұмат, 6 (1:0). Марат, 52 (2:0). Барбоса, 82 (2:1).
Айқын Жаппар
