Көш басында – төрт ұпаймен төртеу
Бүгін Қазақстан премьер-лигасында екінші турдың қалған үш ойыны өтіп, осы матчтарда жеті гол соғылды.
Екінші турдың өзінде-ақ үздіктер екшеле бастады. Әрине, кесіп айтуға – әлі ерте. Командалардың көбісі құрамдарын жаңғыртты немесе нығайта түскендей болды. Биыл қосылған ойыншылардың жаңа ұжымға бейімділеп, үйренісіп кетуіне уақыт керек.
Әйтсе де, көш басындағы төртеу ешкімге таңсық емес. Жанкүйерлер мен мамандар осы клубтардан нәтижелі ойын өрнегін күтеді. Бұлардың бір саты төмен орналасқан «Елімай» да әлі еңсек тіктеуі тиіс. Тек «Ордабасы»... Екінші турда ойсырай қтылып, көш соңынан бір-ақ шықты.
«Астана» Қостанайда «Қызыл-Жармен» кездесіп, екі доп айырмасымен жеңіске жетті. Үш ұпай олжалау көп қиындық туғызбағандай да секілді. Әрі, бұл ресми түрде, осы турдағы қонақтардың жалқы жеңісі болып шықты.
Маусым басынан бері ойыны үйлеспей, көпшілік сынына ұшыраған «Ақтөбе» серпілді. Өз жерінде «Тұранды» тізе бүктіріп, үш ұпай олжалады. Жеңіс голын Еркебұлан Сейідахмет соққанын бөле-жара атап өткіміз келеді.
Биыл бірде-бір легионерсіз ойнап жүрген «Қайсар» құрамы қарымды «Елімай» клубына 72 минут бойы дес бермеді. Алайда ойынның аяғына қарай семейліктер тәжірибелері басым екендігін дәлелдей алды. Бұл ойын «Астана-Арена» стадионында өткен болатын.
«Қызыл-Жар» (Петропавл) – «Астана» – 0:2 (0:2)
Голдар: Чинеду, 11. Грипши, 42.
«Ақтөбе» – «Тұран» (Түркістан) – 2:1 (1:0)
Голдар: Анджелкович, 29 (1:0). Милойко, 55 (1:1). Сейідахмет, 84 (2:1).
«Елімай» (Семей) – «Қайсар» (Қызылорда) – 2:0 (0:0)
Голдар: Тугарев, 72. Плакка, 90.
Әлихан Түсіп
